Running, man!

繼續講慧翠道的記憶之前，先申報個人利益，慧翠道喺我在學嘅時候呢，其實只得一棟建築物，即是而家圖書館以及宿舍中間嗰一棟。

雖然當時只有一楝，但其實都用唔晒架，所謂用唔晒，準確啲來講係唔俾我哋行得晒啦。係呀，好記得上落樓梯之間係有好多錯綜複雜嘅轉角，有好多攔住左嘅通道唔可以行嘅嘢，但我基本上都行過晒，因為好奇心重吖嘛。

又講番慧翠道，我比其他人行得更多嘅原因之一，其實係因為越野跑。係呀，入咗樹仁冇耐就參加咗長跑隊，其實當時嘅長跑隊，只有一隻手掌數得晒嘅幾個人嘅啫，由於每次參加大專盃都起碼要六個，所以每一個出席都係好重要。

不過差不多每一次練習我哋都唔齊人，冇計啦，放學先嚟練跑啊，天都黑晒啦，一係趕住去補習，一係趕住去拍拖，一係趕住去返工，加上樹仁越野跑其實出咗名係陪跑分子，每年喺中大舉行嘅比賽，我哋都係包艇嘅，直到有一年有位喺美國嚟樹仁教英文嘅年輕老師，奮不顧身竟然決定要做越野跑嘅教練，情況有少少唔同咗，首先佢委派咗我做越野跑嘅隊長，威啦，冇錯隊長主要有兩樣工作，第一樣就係要準時出席，第二樣就係要令到其他隊員準時出席！

所以每次練跑前後，我都會不斷催促其他隊員出現，或者問佢點解仲未出現，又或者點解唔出現，甚或至下次會唔會出現！副業之一係會厚顏無恥周圍收靚，周圍去游說嗰啲腳瓜起展嘅同學：喂跑步好正呀，又可以係CU跑來跑去，好多靚女喎⋯

Sell唔Sell到？

梗Sell唔到啦，但都有一兩個比我煩到頂唔住，唯有焗住跑返一兩年，通常之後再見到我都走夾唔抖，無論如何，越野跑係我樹仁四年裏面嘅生涯非常重要，因為由頭到尾跑足四年呀！

咁⋯四年裏面都有過一次高潮嘅，係呀，有一屆我哋唔使包尾呀，係尾二，我哋慶祝仲開心過攞冠軍嗰隊，因為攞冠軍嗰隊都贏慣㗎啦。

呢幾年越野跑嘅經驗係好奇怪㗎，喺個四年裏面我認為係折磨、嘥時間，冇同學會關心！淨係同足球隊訓練嘅熱鬧情況相比，就已經好明顯，於是係某一日跑完之後，我忍唔住問教練點解會有咁嘅情況呢喂？只係比我大幾年嘅教練好淡定同我講，佢話：去踢波梗係多人啦，因為開心happy吖嘛；去練跑梗係少人㗎，因為辛苦囉！不過開心建立嘅友誼係好表面嘅，反而經歷過難關挫折嘅友誼會深刻好多囉！

呢一番說話我有記住，但係當時唔明白，畢業過咗幾年之後慢慢諗下，先至知道呀教練你係有料到！

喺樹仁嘅日子，無論你處於咩嘅位置，參與咩嘅活動，讀緊乜嘢科，恐怕都一樣遇到唔少嘅難處，深呼吸一下，望下你左右同你一齊打仗嘅戰友吖，佢哋可能⋯⋯係你未來最好嘅朋友嚟㗎。