Keep Fit

很多父母都會帶小朋友來診，多年後，已由小學生變成大學生。
我對著少女說：「小朋友，你好耐無同你爸媽黎啦，出黎做野未呀？」
父母插口：「邊有咁快，今年第一年大學，係宿舍2個月都唔返黎一次，…(下拆千字)，搞到身體差哂，所以專登要佢黎食藥！」
我微笑：「由得佢啦，女大不中留啊！」
病人父母笑：「你睇佢幾殘。」
我：「住宿舍係咁架啦，佢大個啦，你理唔到架啦，等多2年(重音)，殘無可殘，遮無可遮，塊面爛哂，就會緊張，自己俾錢睇。」
病人父母：「就係唔想佢搞到咁！」
我：「人類喜愛重復犯錯，唔夠痛，就好快忘記，只要痛定思痛，忍無可忍，就會變。食幾劑藥好唔到幾多，幫佢keep住個樣，只會令佢對your face your fate，依個現實認識唔夠深刻。」

診症過後
我對少女說：「都唔係咁差，係虛少少，每個禮拜做運動，瞓多少少就ok。」
少女(小朋友調皮樣)：「我有做運動，半年啦。」
我平淡回：「嘩！真係睇唔出wo，咩運動？象棋？圍棋？還是康樂棋？」
少女笑：「咩呀，跑步機呀，每個禮拜1個鐘，中間無休息。」
我：「咩速度？」
少女(急)：「雖然係6，但我有出汗。」
我平淡：「係會所，D肥嬸嬸都經常行(重音)跑步機，都出汗架，佢地都應該行左好多年！」

適當時間，做適當事
長者做運動，但關節身體情況未必許可，唯有建議多拉筋，多散步。中年人根據體質和復原力，會提議先從急步走，緩步跑，游水開始。
年青人，復原力強，身體尚可，運動可做較劇烈或逐漸加重。

人而無恆，終身一無所成
讀書如是，做人如事，感情如事，養生都是。
花心是正常，東做一些，西做一些，不打緊，但一定要選其中一個正確的來堅持，持之以恆。大媽們的養生食品和養生功法極多，但大多未見健康，除了因為他們偏愛網路讒言外，亦因不願堅持真正醫護的建議。

小心捷徑
背傷寒論時，有同學問老師：「有無捷徑？」，老師直接答：「就是踏實的一句一句不斷背」，於是這十多年，我依然一句一句的重複。
網絡上經常有很多，「做XX五分等如XX鐘的運動」或「食XX你的XX會年輕X年」。這些題目非常吸睛，可惜內容理論錯誤百出，無效不打緊，但通常有副作用，實在害人不淺。極閒大媽，還會google質量低的資料來支持，低智但聲大，到處咆哮和宣傳，可怕。
正式醫護介紹的都是安全正路方法，急功近利的多不接受。