離開以後

因為呢個專欄，畀機會我可以返多幾次慧翠道，冇錯，諗下當返咗。事實係，同任何關係一樣，講就話希望流水不因石而阻，但係友情絕對會因遠而疏，始終學校唔係响隧道口，又唔係响市中心，要的起心肝回來，不易。

最近一次行上慧翠道，都已經係兩年前(定三年前)，約咗班同學嘅二十週年re-u喇。

呢次二十週年，係一個幾好嘅藉口約見面嘅，見面只半日，約人約半年。終於聚頭，有啲肥咗(大部分)，有啲靚咗(通常係以前唔起眼嘅)，有啲多嘢講咗(通常係做sales個班，老師黨不遑多讓），有啲唔見咗；而最有趣嘅莫過於有幾個同學係好似冇見過咁，「Hello，你/妳好熟面口，查實點稱呼呀陳生……」

呢啲熟悉又陌生嘅感覺，叫做回憶，似足舊相薄咁，睇親都「wee嘩大叫」好有feel，但你又隱隱知道大家分開之後，又係各走各的路，合照都唔易會有下一張。

再諗諗，這些年來十隻手指數得出返樹仁嘅日子，包括補考唔知邊科那天，好忐忑；畢業扮大人影相那天，好青葱邵美珍堂與同學仔分享那天，懶老成；爭取升格大學開會那天，天好藍；落地下搵龔生傾幾句那天，好親切；送別鍾校長那天，人好多，但好靜。

下次幾時再流汗行慧翠道？呢條問題好快就唔止係我嘅青葱煩惱，仲包括埋不久之後嘅你同妳……