2024 年 6 月 24 日
首頁 / 流汗行慧翠道-馬啟仁 / 返學急急腳 放學慢慢行

返學急急腳 放學慢慢行

上落慧翠道,途長路遠,當年家住荃灣,每日都有去旅行嘅感覺,雖然登山途徑有好多種,不過冇一段車程係容易嘅,尤其是對於我呢種,永遠都唔記得預等車時間嘅人嚟講,好在樹仁正門只得一個,但我上堂嘅班房好多都有兩個入口,靜靜地响後門入,就唔怕搶咗忙碌中嘅lecturer風頭啦。

返學如返工,個個趕頭趕命,好不容易終於落堂,成個人醒晒,真正嘅學校生活正式開始。當然,有唔少同學仔亦會趕住仆去搞第樣,我自己亦係其中一位,不過可以的話,試下一星期約一個friend行落山呀。我試過,我真係試過好多次。嗱,上山好似冇咩選擇咁,其實一樣有,問我呢啲跑山人就一清二楚,不過建議你行上去實在冇咩人會聽,所以都係講返落山喇。

就番唔同嘅同學仔同唔同嘅話題,可以選擇唔同嘅路線,若果係壯志豪情類,講埋啲未來大計點點點的話,咁我就強烈建議你哋行北角上山大橋嘅方向,因為响橋頭望落去香港九龍嘅景色係幾壯觀嘅,夠膽的話大嗌兩句加油呀努力呀應該幾有feel,當然勿忘selfie。

咁若果班「放學腳」係「食腳」,志在講下八卦吹下水,咁就行遠啲先夠時間講,方向就梗係向天后方向碌落去,條路一來冇咁斜,二來終點在望就係大坑,食乜都得。

至於個人推介,就應該係介乎天后同北角之間嘅炮台山小徑,呢條路嘅入口不明,要細心搵先見到,啱晒「醉翁之意不在行」嘅朋友仔,沿途風光明媚,樹影婆娑,小橋流水,人影依稀,唯獨係小心狗屎,不過就算冇睇過太陽的後裔都知,路上有地雷實在係有危亦有機,小心呀!我扶你呀!都係同行partner拉近距離嘅好機會,男同學心照啦。

同學仔,返學唔怕急,放學可以慢慢行。

相關新聞

嶄新人生階段定義

最近讀過印象比較深刻的書籍,是由英國經濟管理學者Lynda GrattonAndrew Scott聯合撰寫的《The 100-Year Life》,全書最吸引我的,便是為傳統人生階段的定義,提供了一個嶄新角度。

1 則回應

Leave a Reply

Your email address will not be published. Required fields are marked *