Shuo Online 說在線
之前講到，喺樹仁面試肥佬，咁好彩最後都有書讀，否則無機會喺度同大家發噏風，新聞系夢想破滅之後，好在仲一個社會學系。不過當時嘅我太天真，以為社會學就係讀社工，後來先知一場誤會。原來係有三個科目放埋一齊，包括社會工作、輔導學同社會學。
我知道而家已經改制又唔同咗，咁就不妨講多幾句等大家了解當年嘅玩法，頭兩年三個學科都係一齊讀㗎，對我嚟講呢段時候係最精彩嘅大專生涯囉，同學仔活動多聯誼又多，仲踢波又唱歌樂趣多，呵呵呵，總之就係快樂時光過得特別快，玩足兩年，要揀科喇！
咁我無忘初衷啦當然，平時又搞系會又返教會又做義工，性格開朗積極主動又懶搞笑，點睇都係做社工的材料，咁之不過原來都幾多同學仔同我一樣咁諗，所以呢又要面試嘞，比起year one 一個lecturer面試嚟講，今次勁呀，一入房有三位lecturer(定唔知四位，定十位，總之好多人)坐係度，不過呢都好好傾嘅，經過兩年愉快嘅校園生涯嘅磨練，我已經掌握到一種獨創厚面皮得嚟，唔太有霸氣嘅親切型、東拉西扯溝通方法，加上細細個就已經玩轉小童群益會及明愛及YMCA等中心，以及又半被迫去過老人院及幼稚園做過義工，其實個底真係唔錯，加上當日係房入面都相談甚歡，行出慧翠道個下，見到體育老師龔先生，我差啲就同佢決志：「我大個仔要為人民服務，做社工。」不過見佢掛住同女同學談天，就忍住先無講到啦。
面試之後再考咗個英文筆試，我就拋低咗班同學仔，去咗個長途嘅外展訓練，三個禮拜後變咗舊黑炭頭返屋企，一沖完個靚涼即刻接到學校通知電話，其實係咪已經打咗幾日我心諗，咁心急嘅！
「馬啟仁同學，想通知你社會工作學系落選咗！」
「吓！」
「係呀！」
「咁點呀？」
「讀Socie (sociology)囉！」
「啊，唔該！」
點解又會唔收我…
第二朝，我帶住茫無頭緒嘅身體搭地鐵，咁好彩定唔好彩一上車就見到社工系主任，我即刻一個箭步撲埋去：
「你好呀，食咗飯未啊？今日好好天喎，點解唔收我嘅？」
呀Sir不徐不疾慢慢話：
「你邊位話，啊，其實你面試表現OK㗎，不過呢…」
「不過乜呢？」
「你科英文筆試實在太差啦！」
噢，原來係咁，咁我又無咁hurt喎唔知點解：
「咁我明嘞呀sir，唔緊要啦，得個知字呀嘛！」
廢話幾句之後呀sir急急腳落車，不過係臨行出車廂一刻，佢回頭同我講咗最後一句：
「見你無乜嘢咁，早知收你啦！」
吓！
咩意思呀即是，我由葵芳諗到去佐敦，都參唔透佢咩意思！總之出閘一刻，我知道未來兩年我將要擁抱對咗兩年都做唔到friend嘅社會學，就係摷極都摷唔到張飛嘅果一分鐘，我把心一橫，未來兩年，我決定…豁出去！放心，我好積極嘅！
